СҮТҚЫШҚЫЛДЫ БАКТЕРИЯЛАРДЫҢ ӘРТҮРЛІ АНТИБИОТИКТЕР МЕН МИКРООРГАНИЗМДЕРГЕ САЛЫСТЫРМАЛЫ БЕЛСЕНДІЛІКТЕРІ

Аңдатпа

Зерттеудің негізгі мақсаты – алкогольдік сусындармен зақымдалған ішкі ағза қуыс мүшелеріне оң әсер ететін сүтқышқылды бактерияларға скрининг жүргізу арқылы белсенді штаммдарды анықтау.

Пробиотикалық өнімнің құрамдас бөлігі - белсенді изоляттар. Олар жеке дара немесе консорциум құрамында белсенділік танытады. Жүргізілген ғылыми зерттеу жұмыстың нысаны ретінде бие сүті, қымыз, шұбат, қатық, айран өнімдері алынды. Зерттеу барысында сүтқышқылды өнімдерден 16 сүтқышқылды бактериялардың таза культуралары бөлініп алынды. Олардың антибиотикке төзімділіктері мен антимикробтық белсенділіктері зерттелді.

Зерттеу нәтижесінде жоғары пробиотикалық белсенділікке ие 8 изолят анықталды. Белсенді изоляттар MALDI-TOF Biotyper Bruker масс-спектрометр көмегімен идентификацияланып, олардың Lactobacillus туыстығына жататын келесі түрлері екендігі белгілі болды: L. casei, L. paracasei, L. plantarum, L. rhamnosus, L. acidophylus, L. brevis, L. fermentum.

Белсенді штаммдар (Lactobacillus casei d-3, Lactobacillus paracasei S-612, Lactobacillus plantarum S-106, Lactobacillus plantarum S-414, Lactobacillus rhamnosus S-811, Lactobacillus acidophylus S-1, Lactobacillus brevis S-2, Lactobacillus fermentum d-4) алкогольді сусынмен зақымдалған ішкі ағза қуыс мүшелерін қалпына келтіру үшін қолданатын пробиотикалық өнімге қажетті консорциум құру мақсатында таңдалып алынды.